Ginebra, Meralco luna sa finals ang tirade

CEBU, Philippines — Ang defending champion Barangay Ginebra Kings ug Meralco Bolts naglaraw nga tapuson na sa hingpit ang tagsa-tagsa nila ka mga karibal nga ilang sangkaon og usab sa Game 4 sa best-of-five PBA Governors' Cup finals karong adlawa didto sa Smart Araneta Coliseum.

Unang magbangga ang Gin Kings ug ang NLEX Road Warriors sa alas-3 sa hapon, samtang ang Bolts mohamag sa Magnolia Hotshots sa main game nga gikatakda sa alas-6 sa gabii.

Ang Ginebra midaog sa nag-unang duha ka duwa sa serye apan ang NLEX naka-angkon pa og laing kinabuhi human gipiog ang Gin Kings sa Game 3.

Samtang ang Meralco napukan sa unang duwa apan miresbak kini pinaagi sa pagpayaka sa Magnolia sud sa duha ka sunod-sunod nga higayon.

Bitbit ang 2-1 nga bentaha, ang Ginebra ug Meralco nanginahanglan og usa na lang ka daog aron mo-abante sa kampiyonato.  Kon ugaling molampus sa ilang tahas, ang Gin Kings ug ang Bolts maoy ang magtige sa best-of-seven finals series nga sugdan sunod semana.