Kings, Hotshots nakauna sa semis

CEBU, Philippines — Giunhan sa defending champion Barangay Ginebra Kings ug Magnolia Hotshots ang tagsa-tagsa nila ka mga karibal sa PBA Governors' Cup best-of-five semifinals didto sa Mall of Asia Arena sa Pasay City.

Luyo sa nagkayo nilang 13-0 rally sa naghinapos nga bahin sa duwa, gihubog sa Gin Kings ang NLEX Road Warriors, 95-86.

Si Ginebra coach Tim Cone nakaginhawa og lawom nga nakaipsot sila sa NLEX sa pasiunang duwa sa serye gumikan kay ang usa sa mga sinaligan nilang si Japeth Aguilar way klaro kon makaduwa ba sa Game 2 gumikan kay dunay gihambin nga injury sa iyang bagtak.

"We're glad to finish strong and it was a huge win as we're not sure with Japeth with his calf injury. It's really delicate," matud pa ni Cone.

Si Justine Brownlee maoy nangu sa Gin Kings uban ang 27 puntos ug 14 ka rebounds. Si LA Tenorio midugang og 19 puntos, unom ka rebounds ug unom ka assists samtang si Scottie Thompson miamot og 15 puntos ug 11 ka rebounds.

Dako sab og naambag sila si Arvin Tolentino ug Christian Standhardinger nga nagkumboya og 21 puntos alang sa Gin Kings nga madasigon nga mibangon human malubong og 16 puntos sa ikaduhang kuwarter.

"We started flat and we can't do that against NLEX which is a very aggressive team. We have to have that sense of urgency especially as this is a short series. Buti naman nakalusot pa, it's more of defense than offense," dason pa ni Tenorio.

Sa laing duwa, gibugha sa Magnolia ang Meralco Bolts, 94-80, pagsugod sa kaugalingon nilang serye.

Impresibo sab ang gihimong pagbalitok sa Hotshots human siya mabiyaan og 17 puntos sa first half. Krusyal kaayo ang gipabuto nilang 29-13 run sa ikatulong kuwarter kay nahimo kini nilang taytayan pag-angkon sa gitinguha nilang kalamposan.

"In the second quarter we started playing the Magnolia Hotshots basketball, which is our aggressiveness, our effort," padayag pa ni Magnolia coach Chito Victolero. "It started with our defense. Magandang depensa ipinakita namin sa second half."

Si Mike Harris mibubo og 26 puntos ug 16 ka rebounds sa Hotshots samtang si Jio Jalalon midonar og 15 puntos, unom ka rebounds ug unom sab ka aasists.Nagparamdam sab si Paul Lee uban ang 13 puntos.