Linky Yap misakmit back-to-back titles

CEBU, Philippines — Human nanghawod sa Happy Fiesta Opon Chessfest 2021, ang Sugbuanong FIDE Arbiter nga si Linky Yap milangkat og laing titulo sa senemanang online tournament sa Cebu Executives and Professional Chess Association (CEPCA).

Ning higayona, ang 64-anyos nga si Yap naghari sa The Barracks Chess Club Blitz Series #4 niadtong weekend.

Si Yap, kanhi sakop sa University of the Visayas (UV) varsity chess team sa iyang panahon, nagtabla og si Rosendo Yamyamin nga mitapos sab sa siyam ka hugna nga kompetisyon uban ang 7.0 puntos.

Apan ang amahan ni International Master Kim Steven Yap maoy mibira sa korona sa all-Cepcans category gumikan sa mas taas niining tiebreaker ug giduso si Yamyamin ngadto sa ikaduhang dapit.

Nagsolo sa ikatulong puwesto si Antonio Cabibil bitbit ang 6.5 puntos samtang sila si National Master Jasper Rom, Michael Tinga, ug Archt. Filemon Kapuno III maoy nagkumpleto sa top 6 uban ang 6.0 puntos matag usa.

Sa iyang bahin, si Reynaldo Flores ang midominar sa Cepcans B/Ladies division uban ang 36 puntos.

Ang 63-anyos nga si Flores usa ka retiradong seaman nga naghashas na karon sa abilidad sa mga batan-ong magduduwa og ahedres.

Si Maria Kristine Lavandero mipahiluna sa ikaduhang dapit uban ang 32 puntos samtang naglangkob sa top 5 mao sila si Joseleo Cortes (28 pts.), Jinky Catulay (25 pts.), ug Nicanor Cuizon (23 pts.).