Seth Curry, Embiid misidlak sa sixers

CEBU, Philippines — Sila si Seth Curry ug Joel Embiid mikuha og atensiyon sa dihang gipahagba sa Philadelphia 76ers ang Chicago Bulls, 103-98, sa NBA kagahapon didto sa Wells Fargo Center.

Si Curry mibubo og 22 puntos samtang sila si Embiid ug Georges Niang parehong mitali og 18 puntos alang sa Sixers nga mikadlit sa ikaunom nilang daog sud sa walo ka duwa.

Walay nahimo sila si DeMar DeRozan ug Zach Lavine bisan nagkumboya og 64 puntos gumikan kay ang Bulls na-ihaw sa ikaduha nilang pilde.

Sa laing duwa, si Nikola Jokic mipabuto og 34 puntos apan nahoyhoy ang abaga gumikan kay ang Denver Nuggets nahagba sa mga kamot sa Memphis Grizzlies, 108-106.

Ang reigning MVP nga si Jokic duna say 11 ka rebounds ug lima ka assists samtang si Will Barton midugang og 26 puntos sa pilderong Denver nga natagak ngadto sa 4-4.

Mihipos si Jaren Jackson Jr. og 22 puntos, si Ja Morant mi-iskor og 18, samtang sila si Desmond Bane ug Kyle Anderson dunay 16 puntos matag usa alang sa Grizzlies nga miinat sa ilang baraha ngadto sa 5-3.

Didto sa New York, ang Brooklyn Nets mirampa ngadto sa ikatulo nilang sagunson nga daog human gipahagsa ang Atlanta Hawks, 117-108.

Si Kevin Durant mirapido og 32 puntos, pito ka rebounds ug lima ka assists, samtang sila si Joe Harris, James Harden ug Patty Mills nakatigum og 48 puntos alang sa Nets, nga milusad og nagkayong 34-20 rally sa ikatulong kuwarter aron pakagingon ang Hawks.

Sa Indianapolis, si Myles Turner milansang og pito ka 3-pointers sa iyang 25 puntos samtang si Caris LeVert mitampo og 21 puntos sa dihang gipaksit sa Pacers ang New York Knicks, 111-98.