Barrett bumida sa Knicks; Wizards hiniya
WASINGTON -- Tumipa si RJ Barrett ng 18 points at 4 assists para akayin ang New York Knicks sa 117-99 pagpapatumba sa Wizards sa NBA preseason kahapon.
Nag-ambag si Derrick Rose ng 15 points na tinampukan ng perpektong 3-for-3 shooting sa three-point line para sa ikalawang sunod na panalo ng Knicks.
Binanderahan ni big man Montrezl Harrell ang Wizards sa kanyang 18 points at 10 rebounds habang may 14 at 13 markers sina guards Bradley Beal at Spencer Dinwiddie, ayon sa pagkakasunod.
Sa Boston, humataw si Jayson Tatum ng 20 points, 9 rebounds at 7 assists sa 113-111 paglusot ng Celtics sa Toronto Raptors.
Umiskor si center Al Horford ng 16 markers para sa Celtics at may 13, 12 at 11 points sina Romeo Langford, Grant Williams at Payton Pritchard, ayon sa pagkakasunod.
Pinamunuan ni Fred VanVleet ang Raptors sa kanyang 22 points.
Sa Memphis, naglista sina John Collins at Bogdan Bogdanovic ng tig-16 points para igiya ang Atlanta Hawks sa 91-87 pagdagit sa Grizzlies.
- Latest
