Marc Gasol gibuhian sa Lakers
CEBU, Philippines — Gibuhian sa Los Angeles Lakers sa ilang poder si Marc Gasol pinaagi sa pag-trade sa Espanyol nga sentro ngadto sa Memphis Grizzlies.
Dili hinoon magtinir si Gasol sa Grizzlies. Kini gumikan kay i-release sab dayon siya sa kanhi niya team aron siya magpabilin didto sa Spain uban sa iyang pamilya.
Kahinumduman nga human sa 2020-21 NBA season, si Gasol nakadesisyon nga magpiblin sa uban sa iyang pamilya didto sa yuta niyang natawhan.
Gisugdan ni Gasol ang iyang karera sa NBA uban sa Memphis niadtong 2008. Nakaduwa siya og 11 ka seasons sa Grizzlies sa wala pa motapon sa Toronto Raptors niadtong 2019 diin sila maoy nakampiyon.
Ang 36-anyos nga si Gasol tulo ka higayon nahimong All-Star ug kausa gibayaw nga Defensive Player of the Year.
Klaro na hinoon nga ang Lakers dunay plano nga buhian si Gasol human gipapirma niini og kontrata ang laing duha ka sentro nga sila si Dwight Howard ug DeAndre Jordan.
- Latest
