Capela nagpakupot sa Hawks

CEBU, Philippines — Ang sentrong si Clint Capela mi-uyon nga lugwayan og duha ka tuig ang iyang kontrata uban sa Altanta Hawks sa kantidad nga $46 million.

Kini nagpasabot nga si Capela magpabilin sa poder sa Hawks hangtud sa 2024-25 NBA season.

Ang 27-anyos nga si Capela dako og naambag pagpalupad sa Hawks ngadto sa NBA Eastern Conference finals sa miaging season. Gipasukarap hinoon sila sa Milwaukee Bucks.

Si Capela mi-average og 15.2 puntos ug 14.3 rebounds matag duwa sa regular season. Nindot sab ang gipakita niyang labok sa postseason batok sa New York Knicks ug Philadelphia 76ers.

Gumikan sa presensiya ni Capela, misamot kalig-on ang depensa sa Hawks. Gani mitapos siya ikaduha ni Rudy Gobert sa Utah Jazz sa karera pagka-Defensive Player of the Year.

Nadagit sa Hawks si Capela niadtong 2020 pinaagi sa usa ka trade uban sa Houston Rockets, diin si Capela miduwa sa nag-una niyang unom ka tuig sa NBA.

Si Capela maoy ikatulong starter nga nagpahigot sa Hawks sunod nilang All-Star guard Trae Young ug forward John Collins.