Lowry mitapon sa Miami Heat

CEBU, Philippines — Si Kyle Lowry makig-uban na sa Miami Heat sa sunod nga bahin sa iyang karera ubos sa tulo ka tuig nga kontrata nga mibalor og   $90 million pinaagi sa usa ka sign-and-trade deal nga nakab-ot sa Miami uban sa Toronto Raptors.

Wala pa hinoon gidetalye ang nalatid sa ilang kasabotan apan gitaho ni Adrian Wojnarowski sa ESPN nga isip hulip ni Lowry, lagmit madawat sa Raptors mao sila si Goran Dragic ug Precious Achiuwa.

Gawas sa pagbira ni Lowry, lain pang dako nga lakang nga gihimo sa Heat mao ang pagpapirma ni Jimmy Butler og maximum contract extension nga nagkantidad og $182 million sud sa lima ka tuig, sigun pa sa taho ni Shams Charania sa The Athletic.

Sila si Lowry ug Butler suod kaayong managhigala.

Ang New Orleans Pelicans, Dallas Mavericks, New York Knicks, Philadelphia 76ers, ug LA Lakers naka-interes sab ni Lowry apan ang presensiya ni Butler ug ang mas dako nga suholan naka-impluwensiya ni Lowry aron palabihon ang Heat.

Tataw nga sila si Lowry ug Butler makaporma og usa ka lig-ong puwersa kauban si Bam Adebayo ubos sa pagtimon ni Fil-Am coach Eric Spoelstra.

Human nabitad si Lowry ug gihigtan si Butler sa ilang poder, ang Heat mihimo pa og dugang kasikas pinaagi sa paglugway og lima ka tuig sa kontrata sa tirador nilang si Duncan Robinson sa kantidad nga $90 million.