Pambato sa Calmana nanghawod sa IBP-Cebu online chessfest
CEBU, Philippines — Si Sherily Cua sa Integrated Bar of the Philippines-Calmana Chapter (Caloocan, Marikina, and Navotas) maoy milugwa nga kampiyon sa Lawyer edition sa A Lawyer's Gambit:IBP-Cebu Online Chess Tournament Season 2 nga giduwa niadtong weekend pinaagi sa lichess platform.
Mitali si Cua og 8.0 puntos nga igo kaayo aron langkaton niya ang nag-unang puwesto sa torneyo nga gipasiugdahan sa IBP-Cebu ubos sa liderdato ni Cheryl Palacao-Condat inabagan sa Toledo City Chess Club ug Toledo Trojans.
Nagsolo sa ikaduhang dapit mao si Fernando Tanglao sa IBP-Eastern Samar uban ang 7.5 puntos.
Sila si Jeah Jean Gacang ug Richard Abangan, Jr. sa IBP-Cebu ug Borgy Alava sa IBP-Manila nagtabla bitbit ang 6.0 puntos matag usa apan si Gacang, nga sakop sa Trojans sa Professional Chess Association of the Philippines (PCAP), maoy miangkon sa ikatulong luna gumikan sa mas taas niyang tiebreaker. Si Alava mitapos ikaupat ug gisundan kini ni Abangan.
Si Junnel Tinio sa IBP-Pampanga mitapos ikaunom uban ang 5.5 puntos. Sila si Rupert T. Del Rosario saug IBP-PPLM, Reddy Balarbar sa IBP-Pangasinan, Manuel Zosimo Ozao sa IBP-Cebu City, ug Edgar Calacar sa IBP-Bohol maoy nagkumplketo sa top 10 uban ang 5.0 puntos matag usa.
- Latest
