Bucks gi-usban ang Hawks

CEBU, Philippines — Sila si Khris Middleton ug Giannis Antetokounmpo nagkumbinar og 71 puntos sa dihang gipahagsa og usab sa Milwaukee Bucks ang Atlanta Hawks, 113-102, aron pag-angkon og 2-1 nga labaw sa ilang best-of-seven NBA Eastern Conference Finals kagahapon didto sa State Farm Arena sa Atlanta, Georgia.

Si Middleton mi-iskor og 20 sa iyang 38 puntos sa katapusang kuwarter diin gilabhan sa Bucks ang Hawks, 30-17, dayon na ngadto sa pakubit og 11 puntos nga kadaogan.

Wala sab magpabitin si Antetokounmpo nga mitapos uban ang 33 puntos ug 11 ka rebounds alang sa Bucks nga madasigon mibangon human malubong og 15 puntos sa unang kuwarter.

Kontrolado kaayo sa Hawks ang duwa gikan sa sinugdanan apan wala na sila sa ensaktong porma sukad na-ilog sa Bucks abng labaw, 82-80, sa nahibilin nga 1:45 sa ikatulong kuwarter.

Mi-arangkada dayon si Middleton nga maoy utok sa panapos nga 25-7 rally sa Bucks nga nakapasukarap sa Hawks sa hingpit.

Si Trae Young mipabuto og 35 puntos samtang si Danilo Gallinari midugang og 18 puntos alang sa Hawks, nga mosuway pagtaba sa serye sa Game 4 karong Miyerkules didto gihapon sa ilang balwarti.