Durant gi-agak ang Nets
CEBU, Philippines — Brooklyn giunhan ang Bucks sa NBA East semis
Si Kevin Durant mikulit og 29 puntos ug milangkat og 10 ka rebounds sa dihang ang Brooklyn Nets nakasugakod sa 34 puntos ni Giannis Antetokounmpo aron paludhon ang Milwaukee Bucks, 115-107, sa pasiunang duwa sa ilang best-of-seven NBA Eastern Conference semifinals kagahapon didto sa Barclays Center sa Brooklyn, New York.
Midaog ang Nets bisan og wala ang usa nila ka superstar nga si James Harden, nga mitaak sa korte sud lamang sa 43 segundos gumikan kay nabalikan sa iyang hamstring injury.
Dako sab og naambag sila si Kyrie Irving ug Blake Griffin.
Si Irving mihipos og 25 puntos ug walo ka assists samtang si Griffin miamot og 18 puntos ug 14 ka rebounds alang sa Nets, nga mosuway pagposte og 2-0 nga bentaha sa serye karong Martes didto gihapon sa ilang balwarti.
Wala kaugpo ang Bucks bisan pa man sa nindot ng duwa ni Antetokounmpo, nga mikolekta sab og 11 ka rebounds.
Ang Nets milusad og nagbagang 20-8 rally sa ikaduhang kuwarter aron pagrehistro og 59-48 nga labaw apan ang Bucks miresbak pinaagi sa 13-4 run hinungdan nga nakasikit sila ngadto na lang sa dos puntos sa halftime, 61-63.
Apan ang Nets nanginit og balik ug mipaulbo og 12-4 nga ratsada hinungdan nga gipaburot ang ilang labaw ngadto na sa 14 puntos, 98-84, padung ngadto sa pinal nga 12 minutos sa aksiyon. Wala na molingi pa sukad niadto ang Nets.
- Latest
