Spence puntiryang ma-KO si Pacquiao
MANILA, Philippines — Nagyabang si World Boxing Council (WBC) at International Boxing Federation (IBF) welterweight champion Errol Spence Jr. na patutumbahin nito si eight-division world champion Manny Pacquiao.
Ayon kay Spence, ilalabas nito ang lahat ng kanyang alas upang makuha ang matikas na knockout win laban kay Pacquiao sa kanilang bakbakan sa Agosto 21 (Agosto 22 sa Maynila) sa Las Vegas, Nevada.
Target ni Spence na pagretiruhin na sa boxing si Pacquiao.
“I meant to get as strong as I can to knock out Manny Pacquiao and send him off to retirement,” ani Spence sa panayam ng Barbershop Conversations.
Alam naman ni Spence na hindi birong kalaban ang Pinoy pug dahil malalim ang karanasan nito at nagtataglay ito ng mabagsik na kamao.
Nasilayan na ng buong mundo ang kakaibang bagsik ni Pacquiao sa kanyang mga nakalipas na laban.
Subalit asahan din ang mas mabangis na Spence dahil mas malakas na puwersa ang ilalatag nito kumpara sa kanyang nakalipas na laban kontra kay Danny Garcia.
Matatandaang naitala ni Spence ang unanimous decision win laban kay Garcia noong Disyembre sa Arlington, Texas.
Subalit hindi kuntento ang boxing fans sa ipinakita ni Spence dahil mas mabagal ito kumpara sa kanyang dating laban.
Isa sa mga itinuturong dahilan ang car accident na kinasangkutan nito noong 2019 na posibleng may malaking epekto sa kanyang pangangatawan.
“I’m expecting the same Manny Pacquiao we see every time, and he’ll come to fight. I’ll be a lot stronger than (in) my previous fight (with Danny Garcia),” ani Spence.
Sa ngayon, magagaan na workouts muna ang pinagdadaanan ni Spence.
Magsisimula na ang pukpukang ensayo ni Spence sa Hunyo 21.
- Latest
