Rehistrasyon abli na sa Guardo MTB Challenge

CEBU, Philippines — Nagsugod na ang rehistrasyon alang sa 1st Jerry Guardo X-Treme Mountain Bike Challenge, nga ipahigayon ubos sa istriktong patakaran sa panglawas ug kaluwasan karong Hunyo 19 didto sa Barangay Bonbon, dakbayan sa Sugbu.

Gipasiugdahan ni Cebu City Councilor Jerry L. Guardo, ang kulbahinam nga kompetisyon naglangkob og walo ka mga kategoriya.

Kini mao ang open/elite, kids (12 ngadto sa 16 anyos), beginners (17-24),  juniors (25-34), executive (35-49), veterans (50-above), women's open, ug fat bike. Miabot ngadto sa P50,000 nga ganting salapi ang iapud-apud sa mga mananaog sa tanang division. Ang kinadak-an bahin niini kabihon sa open/elite class diin ang top 5  mobulsa og P5,000, P3,000, P2,000, P1,000, ug P500.

Kadtong gusto moapil pabayron og P300 apil na niini ang full sublimation finisher's shirt ug libreng pagkaon human sa lumba.

Ang registration forms puyde nang makuha sa JM Cycle kilid sa Mambaling Elementary School.

Alang sa dugang detalye, mahimong mokontak nilang Dongkee (0933-0080455) ug Mikel (0933-5120240).