Westbrook mibuak record ni Robertson

CEBU, Philippines — Nabihag man tuod ang Washington Wizards sa Atlanta Hawks, 124-125,  apan wala kini mahimong tunok ni Russell Westbrook pagkulit og kasaysayan sa NBA dihang iyang gibuak ang karaang rekord ni Oscar Robertson alang sa labing daghang "triples-doubles" kagahapon didto sa State Farm Arena, Atlanta, Georgia.

Nakompleto ni Westbrook ang iyang ika-182 ka "triple-doubles" human milangkat sa ika-10 niyang rebounds sa nahabiling 8:30 sa fourth quarter. Siya sab ang  labing unang magduduwa gawas ni Robertson nga nakabaton og rekord sukad niadtong 1961-1962. Ang nine-time All-Star ug 2016-2017 MVP mitapos sa duwa bitbit ang 28 puntos, 21 ka assists ug 13 ka rebounds dihang iyang gisapwang ang palas-unon sa Wizards, kinsa niduwa nga wala ang ilang leading scorer nga si Bradley Beal.

Niadtong Sabado, si Westbrook nagtabla uban ni Robertson dihang siya mihipos og 33 puntos, 19 ka rebounds ug 15 ka assists sa ilang 133-132 nga kadaogan sa overtime batok sa Indiana Pacers.

Ang point guard sa Wizards nakahimo na og 36 ka "triple-double" karon nga season ug posibleng mapun-an pa kini diin aduna pa sila'y nahabiling tulo ka duwa.

Mikabkab og 36 puntos si Trae Young aron mangulo sa opensa sa Hawks. Milangkat sab siya og unom ka rebounds ug siyam ka steals. Si John Collins milawog sab og 28 puntos sa Hawks nga karon mibatog na sa ikalimang dapit sa Eastern Conference standing tangag ang 38-31 nga baraha.

Nangayo og time-out ang Wizards sa nahabiling 39.7 segundos human si Collins mikombertir sa iyang duha free throws nga nagtugpo sa Hawks ngadto sa 125-122 nga abante.

Nahimong kulbahinam ang duwa dihang misikit ang Wizards human sa floating jump shot ni Westbrook, 124-125 sa nahabiling 18.2 segundos nga nakaaghat sa Hawks pagtawag og time-out.

Mahimo untang bayani si Westbrook sa Wizards dihang ilang ang ball possession, apan mikagar ang iyang 3-point shot.

Si Bogdan Bogdanovich miamot og 25 puntos ug si Clint Capela milangkat og 22 ka rebounds alang sa Hawks. 

Sa lain pang mga duwa, ang Indiana Pacers mipilde sa Cleveland Cavaliers, 111-102, ang Memphis Grizzlies mipukan sab sa New Orleans Pelicans, 115-110, ang Golden State Warriors mibuntog sa Utah Jazz, 119-116.

Ang San Antonio Spurs milubong sa Milwaukee Bucks, 146-125, samtang gilubong sab sa Portland TrailBlazers ang Houston Rockets, 140-129.