R.B. Potot Sr. Memorial chessfest mosikad karon

CEBU, Philippines — Ipahigayon na karong adlawa ang 1st R.B. Potot Sr.Memorial Chess Tournament nga duwaon ubos sa estriktong patakaran sa panglawas ug kaluwasan didto sa Solea Mactan Resort sa Cordova, Cebu.

Giorganisar sa RiChessmasters (RCM) ug Professional Chess Association of the Philippines (PCAP) teams Lapu-Lapu City Naki Warriors ug Cordova Dutchess Dagami Warriors, ang 7-round Swiss system competition gituyo paghimo agi'g paghandum sa Cebuano chess legend R.B. Potot Sr., kinsa mitaliwan tungod sa ordinaryo nga kamatayon niadtong Pebrero.

“This tournament was organized to pay tribute to my father, R.B. Potot, who taught many Cebuano kids the game of chess back in the 1950s and 1960s,”  matud pa ni Ariel Potot, segun sa taho ni Ricky Olivares sa Philstar.com.

Si Potot nga maoy founder ug CEO sa RCM, mao sab ang vice chairman sa PCAP, ang labing unang professional chess league sa nasud. Niduwa siya sa Dagami Warriors ug nahimutang sa ikawalo sa Southern division ug nakaabot sa playoffs sa PCAP’s All-Filipino Conference.

Adunay gitagana nga P15,000 nga ganting salapi alang sa mga mananaog diin ang kampiyon mobulsa og P5,000, samtang ang ikaduha hangtod sa ikalima makadawat og  P3,500, P2,500, P800 ug P700.

Mopahiluna gikan sa ikaunom hangtod sa ika-10 nga dapit gantihan og P500 matag usa.