Embiid gisugat og daog pagbalik sa Philadephia

CEBU, Philippines — Daog maoy misugat ni Joel Embiid sa pagbalik sa Philadelphia 76ers nga mipukan sa Minnesota Timberwolves, 122-113 sa NBA kagahapon didto sa Philadephia.

Mirehistro siya og 24 puntos ug walo ka rebounds, apan si Tobias Harris maoy nangu sa scoring sa 76ers nga mikamada og 32  puntos.

Si Ben Simmons mitampo og 14 puntos, walo ka rebounds ug unom ka assists alang sa Philadelphia  nga nagtabla karon uban sa Brooklyn Nets nga adunay labing nindot nga rekord sa Eastern Conference sa managsamang baraha nga 34-15. Si Embiid napalta og 10 ka mga duwa tungod sa  bun-og sa wala niining tuhod.

Maayo na ang lihok ni Embiid, apan ang iyang duwa dili sama ka hait sa wala pa siya makahiagom og injury nga iyang naangkon niadtong Marso 12 sa ilang pagpanulong sa Washington Wizards.

Si Embiid mipasud og unom sa 14 ka itsa gikan sa field, apan mikagarang tanang upat niya ka 3-pointers ug adunay 12 sa 17 ka free throws.

Ang Timberwolves nga nagkupot sa labing bati nga rekord sa NBA sa ilang 12-38 nga baraha gipangulohan ni Karl-Anthony Towns nga mipabuhagay og 39 puntos, 14 ka rebounds ug lima ka assists. Didto sa  Washingtong, si Luka Doncic miiskor og 26 puntos alang sa Dallas Mavericks nga midaog batok sa Washington Wizards sa iskor nga 109-87.

Si Doncic aduna sa'y walo ka rebounds ug unom ka assists dihang ang Mavericks milansang sa ilang ikaupat ka sunod-sunod nga daog aron pagkompleto sa ilang lima ka road games nga 4-1.

Mitampos si Jalen Brunson og 19 puntos ug Boban Marjanovic miposte sa iyang ikatulong "double-double" karon nga season  uban ang 15 puntos ug 12 ka rebounds.