Sanman mopahigayon sa labing unang bubble series sa Marso 17
CEBU, Philippines — Ang Sanman Boxing mopahigayon sa ilang labing unang bubble series ning tuiga nga bitoonan ni welterweight contender Rimar 'Terminator' Metuda karong Marso 17 didto sa Sanman Gym sa General Santos City.
Si Metuda (14-6-1, 8KOs) makigsangka sa beteranong si Eden Sonsona (36-12-2, 13KOs) sa unom ka hugna nga binakbakay ubos sa 140 lbs.
Ang kanhi WBC Asian Boxing Council Continental featherweight champion nga si John Vincent 'Mulawin' Moralde (23-4, 13KOs) ug kanhi WBO Asia Pacific super flyweight titlest Froilan 'Sniper' Saludar (31-4-1, 22KOs) moladlad sab sa ilang abilidad batok sa tagsa-tagsa nilang kaatbang sa siyam ka hugnang sinulkliay og kumo.
Si Moralde, kinsa niaway sa panahon sa pandemiya, apan napilde pinaagi sa first-round knockout ngadto ni Jose Enrique Durantes Vivas niadtong Oktubre 17, 2020 didto sa MGM Grand sa Las Vegas, Nevada, moharong ni Kim Lindog sa six-round lightweight bout.
Sa pikas bahin, si Saludar nga gihuboan sa iyang WBO regional belt sa Hapon nga si Ryoji Fukunaga sa katapusan niyang away niadtong Pebrero 14 sa miaging tuig didto sa Korakuen Hall sa Tokyo, makigsangka ni Mark Rey Taday sa walo ka hugna nga pinaksitay. Giimbitar ni Sanman CEO Jim Claude "JC" Manangquil ang tanang mahiligon og boksing sa pagtan-aw sa livestream sa maong mga sangka pinaagi sa Sanman's Facebook page.
- Latest
