Suns mipaksit sa Sixers

Milansang ikalimang sunod-sunod nga daog

CEBU, Philippines — Padayong naglagiting ang kainit sa Phoenix Suns ug mipakaging sa Philadelphia 76ers, 120-111  sa nagpadayong aksiyon sa National Basketall Association kagahapon didto sa Talkstick Resort Arena sa Phoenix, Arizona.

Init kaayo si Devin Booker diin mipabuhagay kini og 36 puntos aron mangu sa lima ka Suns players nga mitimbre'g double digits.

Ang 10-time All-Star nga si Chris Paul mitikdol og 18 puntos, 10 ka  assists ug walo ka rebounds alang sa Suns nga nilansang sa ilang ikalimang sunod-sunod nga daog.

Si Dario Saric mitampo og 15 puntos, samtang sila si E'Twaun Moore ug Deandre Ayton nagtampohay og 11 puntos.

Gipangulohan sab ni Joel Embiid ang Sixers nga mikamada og 35 puntos ug milangkat og walo ka rebounds, gisundan ni Ben Simmons nga miabuno'g 18 puntos uban ang unom ka rebounds. Si Tobias Harris miiskor sab og 18 puntos.

Sila si Danny Green ug Seth Curry mitampo'g 10 puntos matag usa alang sa napildeng Sixers nga nasagunsonan og duha ka pilde.

Bisan pa niini, ang 76ers mao gihapon ang nagkupot sa unang dapit sa Eastern Conference standing bitbit ang 18-9 nga  baraha.

Labaw og usa ka palito ang Sixers human sa lay-up ni Simmons sa nahabiling 4:36 sa second period. Si Booker mipasud og usa ka 15-foot jumper aron pagtabla sa duwa, 47-all sa 2:18 ang nasalin nga oras sa dili pa ang breaktime.

Sa katapusang 0.5 segundos, si Embiid mihimo og basket aron tablahon og usab ang iskor sa halftime, 53-all.

Si Simmons nangu sa tanang scorers uban ang 16 puntos, samtang si Booker sab sa habig sa Suns nga adunay 12 puntos sa first half.

Mipasud og usa ka 3-pointer si Paul aron pagpaabante sa Suns, 60-55 sa nahabiling dos minutos sa third quarter.

Padayong nanginit si Booker sa third period diin miiskor siya og 16 puntos sa Suns nga nilabaw og singko puntos, 86-81 paghuman sa maong kuwarter.

Duha ka sunod-sunod nga tres sa Suns maoy miabli sa fourth ug giinat ang ilang labaw, 92-81 dayon na pagkulit og daog.