ARQ Stable mohimo'g kasikas sa Cebu boxing

CEBU, Philippines — Ang managtiayong Jason ug Eva Mari Arquisola nagpanikad nga mohimo og kasikas sa Cebu boxing pinaagi sa bag-ohay pa nilang gitukod nga ARQ Stable ug ARQ Promotions.

Si Jason Arquisola mas nailhan sa natad sa basketbol tungod sa iyang ARQ Builders ballclub nga kanunay'ng kampiyon sa nagkadaiyang mga torneyo dinhi sa Visayas ug Mindanao sa wala pa ang pandemiya.

Gani pipila pa lamang ka semana ang milabay, giporma ni Arquisola ang ARQ/Lapu-Lapu City Heroes nga mopakita'g aksiyon sa labing unang Pilipinas Vismin Super Cup, ang labing bag-ong prospesyonal nga liga sa basketbol sa nasud.

Apan tungod sa lain pa niyang hilig, si Arquisola nangahas pagsud sa kalibotan sa boksing.

Isip labing bag-ong personalidad sa boksing dinhi sa Pilipinas, si Arquisola lagmit maoy mosikad sa eksena sa boksing dinhi sa Sugbo ning tuiga pinaagi sa umaabot niyang promosyon nga tentatibong gikatakda karong Marso 20 sud sa bubble nga ilang iplastada sa San Remigio Pensionne Suites sa Barangay Mabolo, Dakbayan sa Sugbu.

Kon ugaling wa'y mga kakulian, ang tanang pito ka mga boksidor sa ARQ Stable nga sila si April Jay Abne, Berland Robles, Ian Abne, Zandro Librador, John Paul Gabunillas, Yerrodge Gura ug Neil Canete mokubati sa maong closed-door event ubos sa istriktong patakaran sa kaluwasan ug panglawas.