Rockets mibombardiyo og 28 ka 3-pointers pagbuntog sa Thunder

CEBU, Philippines — Si Eric Gordon miiskor og 25 puntos ug ang Houston Rockets mitala og NBA record-tying nga 11 ka 3-pointers sa ilang 48 puntos sa first quarter nga maoy gihimo nilang pundasyon aron makab-ot ang makabungog nga kadaogan batok sa Oklahoma City Thunder, 136-106 sa NBA kagahapon.

Si John Wall miiskor sa iyang unang otso puntos alang sa Rockets ug mihipos og 18 puntos, unom ka rebounds ug lima ka assists, samtang si Christian Wood miiskor sab og 18 puntos, apan aduna siya'y 11 ka rebounds sa ikaunom nga sunod-sunod nga daog sa Rockets.

Sila si Gordon, Wood ug Victor Oladipo parehong nihipos og 10 puntos sa unang 12 minutos sa duwa ug ang Rockets nga sa usa ka higayon nilabaw og 26 puntos.   

Nangu sa Thunder mao si Shai Gilgeous-Alexander nga mipadahunog og 19 puntos, samtang sila si Darius Bazley ug  Hamidou Diallo mitampo'g 15 puntos matag usa.

Didto sa Atlanta, si Anthony Davis mikandos og 25 puntos, samtang si LeBron James mipupo og 21 puntos sa dihang gibuntog sa Los Angeles Lakers ang Hawks, 107-99  pagtapos sa ilang road games didto sa State Farm Arena sa Atlanta, Georgia.

Si James milangkat sab og pito ka rebounds ug mitunol og siyam ka assists, apil na ang usa ka clutch three-pointer nga naghatag sa Lakers og 101-97 nga labaw sa kapin uno minutos ang nahabiling oras sa duwa.