James Bacon nakasagunson tulo ka daog sa US

CEBU, Philippines — Ang Sugboanong welterweight contender nga si James Bacon wa'y puas nga mikastigo ni Ramon De la Cruz Sena sa Argentina aron pagkulit og impresibong kadaogan pinaagi sa unanimous decision sa undercard sa "Fight Night X" nga gipasiugdahan sa M&R Promotions niadtong Domingo didto sa Four Ambassadors Hotel sa Miami, Florida.

Ang garbo sa Maguikay, Dakbayan sa Mandaue nga miaway ubos sa Sanman Gym nga tua magbasi sa General Santos City dominante kaayo sa tibuok 10 ka hugna nga sangka hinungdan nga gilubong niya si Sena sa tanang tulo ka scorecards sa parehong iskor nga 100-90. Mao kadto ang ikatulong sagunson nga daog ni Bacon sukad sa pagsugod og balik sa boksing didto sa Amerika. Una na siyang miposte og duha ka sunod-sunod nga knockout batok nilang Gonzalo Carlos Dallera ug Roque Agustin Junco nga pulos Argentinians.

Ang 30-anyos nga si Bacon nga kanhi naghari isip Philippine super featherweight champion, nagbitbit na karon og 26-4 win-loss record uban ang 17KOs. Nagplano siya manaog sa timbang ug mokampanya sunod sa light welterweight division, matud pa ni Ramon Falgui sa Team Sanman.