Golden boy mibaraw away nilang Pacquiao ug Garcia

CEBU, Philippines — Ang gihugon-hugon nga sangka tali nilang Pinoy ring star Manny Pacquiao (62-7-3, 39KOs) ug wa'y pildeng lightweight contender nga si Ryan Garcia (21-0, 18KOs) daw hanap pas dyes panas nga mahitabo.

Sukad iyang gipalukapa si Luke Campbell sa ikapitong hugna aron sakmiton ang interim WBC lightweight belt niadtong Enero 3, ang 22-anyos nga si Garcia bokal kaayong mipadayag sa iyang tinguha nga makigbinukbukay sa idolo niyang si Pacquiao nga maguwang niya og 20 ka tuig.

Gani si Garcia andam mokatkat ngadto sa duha ka weight class aron lamang matuman ang gihulagway niyang 'dream fight'.

Hangtod karon, magpabilin kining damgo ni Garcia.

Kini human ang Golden Boy Promotions nga maoy promoter ni Garcia, mipadayag ngadto sa ESPN Sports nga ang bugno tali sa duha ka mga boksidor wala sa listahan sa ilang umaabot nga mga kalihukan.

"There's nothing to talk about there," matud pa ni Golden Boy President Eric Gomez. "They contacted us, but it turns out there's nothing to talk about. That fight isn't going to happen."

Sa iyang bahin, ang ahente ni Garcia nga si Guadalupe Valencia miinsister nga abli pa gihapon ang pultahan alang sa maong away nga mahitabo.

Apan samtang si Garcia nagpanikad nga makaharong si Pacquiao ibabaw sa ring, si Gomez ug ang  Golden Boy dunay laing plano alang kaniya.

Si Gomez mibutyag nga human siya ug si Golden Boy CEO Oscar De La Hoya nakigtagbo ni Top Rank chairman Bob Arum dili pa lamang dugay, iyang gikonsidera si unified lightweight champion Teofimo Lopez isip posibleng sunod nga kontra ni Garcia.