Toledo dunay misyon

CEBU, Philippines — Labaw sa pagdaog og mga duwa, ang Toledo City Trojans nagdala uban kanila og mas mahinundanong misyon sa pagporma nila og team alang sa All Filipino Conference sa labing unang Professional Chess Association of the Philippines (PCAP) online tournament nga giduwa na karon kaduha matag usa ka semana pinaagi sa lichess platform.

Ang Trojans ni team owner Engr. Mardee Gacang De la Peña usa sa upat ka Cebu teams nga mipakita'g aksiyon sa labing unang propesyonal nga liga sa chess sa Pilipinas. Ang uban mao ang Lapu-Lapu City Naki Warriors, Cebu City Machers, ug Cordova Dutchess Dagami Warriors.

Nangambisyon man tuod sila nga molampos ug hatagan ang Dakbayan sa Toledo og maayong representasyon sa torneyo, ang Trojans dunay laing tumong sa ilang huna-huna ug kini mao ang pagpahugyaw og maayo sa duwang ahedres sa ilang dapit uban ang panghinaut nga makaumol sila og chess master sa umaabot.

"Our main goal really in joining this historic league is to create chess awareness in Toledo and ultimately produce a master/titled player from our city in the future," paambit pa ni Atty. Jeah Jean Gacang, ang top lady player sa Toledo nga kanhi sakop sa University of Cebu (UC) chess varsity team sa iyang panahon sa kolehiyo. Aktibo na hinuon daan ang chess sa Toledo tungod sa inisyatiba sa Toledo City Chess Club. Gani niadtong panahon sa kwarantin, nagpadayon ang ilang mga aktibidades pinaagi sa online tournaments nga ilang gipahigayon halos matag gabii.