Virtual Cebu Marathon 2021 mosikad na
CEBU, Philippines — Dul-an sa 2,000 ka runners ang makigbisog sa nagkalain-laing matang sa kasinatian dihang ang Virtual Cebu Marathon 2021 mosugod na karong adlawa.
Bisan tuod nasugdan ang virtual race, kadtong mga interesado mahimo pa gihapon nga makaapil kay ang nag-organisar niini nga Cebu Executive Runners Club (CERC) mopadayon man sa deadline sa registration hangtod karong Domingo. Gihimo kini tungod kay ang running period sa Cebu Marathon ning tuiga nga ipahigayon ubos sa new normal himuon sa Enero 8 hangtod 25.
Ang mga partisipante gikatag ngadto sa 15K, 21K ug 42K nga mga distansiya. Magpili sila kon asa sa tulo ka kategoriya ang gusto nilang apilan.
Mahimo sila mogamit og bisan unsang running app gikan sa ilang android o iOS smartphone aron pagrekord sa ilang dagan. Puwede sab sila nga mogamit sa ilang GPS watch o fitness bands basta makita ang distansya, gidugayon ug petsa.
Ang entry fee nagkantidad og P780 sa tanang mga kategoriya. Tanang finishers makadawat og e-Certificate, souvenir shirt ug medalya.
Alang sa dugang mga detalye o pangutana, mahimong mobisita sa cebumarathon.ph.
- Latest
