L.A. Lakers nakasagunson upat ka daog

CEBU, Philippines — Mikandos og 26 puntos matag usa sila si LeBron James ug Anthony Davis alang sa bisitang Los Angeles Lakers nga nakaipsot bitbit ang 94-92 nga kadaogan batok sa Memphis Grizzlies kagahapon didto sa Memphis, Tennessee.

Si James milangkat sab og 11 ka rebounds ug pito ka assists, samtang si Davis adunay 10 ka rebounds ug tulo ka blocked shots alang sa Lakers nga milansang sa ilang ikaupat ka sunod-sunod nga daog karon nga season. Si Dennis Schroder mitampo og 12 puntos.

Mikulit si Jonas Valanciunas  og 13 puntos ug adunay 11 ka rebounds, samtang sila si Gorgui Dieng ug Dillon Brooks pareho sab nga miiskor og 13 puntos sa kapildihan sa Memphis.

Si Davis mi-dunk gikan sa assist ni James aron hatagan ang Lakers og 86-81 nga labaw sa nahibiling 1:35 sa duwa. Si James mihimo og turn-around jumper aron  pabiling maglabaw og singko puntos sa 1:03 ang oras nga nahibilin ug iyang natapalan ang itsa ni Brandon Clark sa nahabiling 49.4 segundos nga nakapawong sa paglaum sa Grizzlies.

Usa ka three-point play pagsugod sa fourth period mihatag sa Grizzlies og 71-67 nga labaw, apan ang duha ka teams padayong nagsinukliay og mga puntos hangtod si Davis miposa og 3-pointer aron molabaw ang Lakers og usa ka lugas, 80-79 sa nahabiling 4:22 sa maong kuwarter.

Ang Lakers nabiyaan og kuwatro puntos sa halftime, 45-49, apan nailog nila ang labaw ug gibingat pa ngadto sa 65-58 sa katapusang 3:45 sa third kuwarter. Nailog og balik sa Grizzlies ang labaw, 66-65 sa turnaround jumper ni Valanciunas sa wala moposte og uno punto nga labaw sa fourth quarter.

Sila si James ug Davis nagkumboya'g 15 ka sagunson nga puntos sa hinapos nga bahin sa fourth period hatagan ang Lakers og komportabling labaw, 92-83 sa nahibiling 31:1 segundos sa duwa.

Sa lain pang mga resulta, ang Brooklyn Nets milubong sa Utah Jazz, 130-96 alang sa ilang 4-4 nga baraha, ang Denver Nuggets midaog batok sa Minnesota Timberwolves, 123-116, ang Chicago Bulls misungag sa Portland TrailBlazers, 111-108 ug ang San Antonio Spurs mipaluhod sa Los Angeles Clippers sa iskor nga 116-113.