Marcial bunyagan isip‘pro’ atol sa adlaw natawhan ni Pacquiao
CEBU, Philippines — Duha ka bulan na ang milabay sa dihang ang Olympics-bound Filipino boxer nga si Felix Eumir Marcial unang mitikang sa Wild Card Gym, ang Hall of Fame trainer nga si Freddie Roach daw nahibalik sa iyang panan-aw ang batan-o nga si Manny Pacquiao diha sa iyang pamayhon.
Sama ni Marcial, si Pacquiao dili kailhan nga boksidor sa iyang pagsulod sa entrahanan sa iladong sweat shop ni Roach didto sa Los Angeles niadtong 2001.
Apan si Pacquiao daw bagyo ang kakusog sa iyang pagkahimo nga labing bantugan nga boksidor sa kasaysayan.
Dili tingali siya makatupong sa kaabtik sa gi-idolo niyang si Pacquiao, apan mao usab kana ang direksiyon sa iyang pakigbisog nga makahimo og pangan sa iyang kaugalingon.
Ug maayo kaayo nga pagka-atol nga ang unang pakig-away sa 24-anyos nga si Marcial isip pro matumong sa adlaw’ng natawhan ni Pacquiao. Seguradong makadugang kini sa motibasyon ni Marcial nga mohimo og impresyon sa iyang bunyag sa kayo sa pro batok ni power-punching Andrew Whitfield (3-1, 2KOs) sa Idaho sa upat ka hugna nga middleweight fight karong Disyembre 16 (petsa 17 sa Pilipinas) didto sa Microsoft Theatre sa Los Angeles, California.
Si Pacquiao nga mag-42 anyos sa maong adlaw, nanghinaut nga buligan si Marcial og maayong palad sa pagsugod sa bag-ong panid sa iyang boxing career.
“On behalf of MP Promotions and Filipinos in our country and around the world, I’d like to say how proud we are of Eumir,” sumala pa sa pamahayag ni Pacquiao. God bless Eumir Marcial.”
Bisan og usa na siya ka pro, ang taga-Zamboanga nga si Marcial subling miingon nga ang pagdaog og makasaysayanong bulawan nga medalya alang sa Pilipinas sa Tokyo Olympics sunod tuig maoy una niyang prayoridad.
- Latest
