Crawford mi-tko ni Brook

CEBU, Philippines — Nadepensaan ni Terence 'Bud' Crawford ang iyang WBO welterweight title human kulataha si Kell Brook dayon na ngadto sa pagkulit og impresibong kadaogan pinaagi sa 4th round TKO kagahapon didto sa MGM Grand bubble sa Las Vegas.

Sikit pa unta kaayo ang ilang kumbati sa nag-unang tulo ka hugna, apan ang walay pildeng si Crawford kalit lang nagmangtas sa ikaupat nga hugna diin iyang gidabo-dabohan og kulata si Brook.

Ang 33-anyos nga si Crawford mipatugpa og solidong mga kumo nga nakapalipong ni Brook hinungdan nga mibarag kini ngadto sa pisi.

Nakasugakod pa si Brook human iphi ni reperi Tony Weeks, apan gibatil na sab dayon kini og kulata sa agresibong si Crawford nga nakapaaghat ni Weeks nga undangon ang away sa oras nga 1:14 sa ikaupat nga hugna.

Gumikan niini, si Crawford miinat sa perpekto niyang rekord ngadto sa 37-0 nga gidayan-dayanan na karon og 28KOs, samtang si Brook natagak ngadto sa 39-3 uban ang 27KOs.