12th Cebu Open dancesport mosikad karon

CEBU, Philippines — Human sa kalampusan sa ilang mga kompetisyon pinaagi sa online kausa sud sa duha ka semana, ang Cebu City Sports Commission inabagan sa Team Cebu City Dancesport mopasiugda og mas lapad nga aksiyon, gikan sa lokal ngadto sa internasyonal ning higayona.

Gatosan ka mga pares sa mananayaw gikan sa nagkadaiyang dapit sa nasud ug Asya ang mokumbati na sa 12th Cebu Open dancesport tournament nga sugdan na karong adlawa.

"Cebu is making history," matud pa ni CCSC chairman Edward Hayco. "We may be organizing not just Asia's largest, but probably the biggest online dancesport competition in the world.This may yet be another milestone for Cebu City."

Sa labing uwahi nilang ihap, kapin sa 500 na ka mga atleta ang nakarehistro ning duha ka adlaw nga torneyo diin ang 100 gikan sa Asya ug Russia.

Si Hayco nagkanayon nga ang tanan nilang gibuhat dili mahimong posible kon wala pa ang suporta nilang mayor Edgardo Labella, Philippine Sports Commission chairman William "Butch" Ramirez, PSC commissioner Mon Fernandez, CCSC vice chairman Lorenzo "Chao" Sy, executive director Amilo Lopez, councilor Dondon Hontiveros, school board chairman Raddy Diola, ug DepEd-Cebu City Schools Division Superintendent Rhea Mar Angtud.

Ang 12th Cebu Open makita pinaagi sa live streaming sa Facebook page sa Dancesport Team Cebu City.