Vicelles mi-TKO sa kontra, pabiling wa'y pilde

CEBU, Philippines — Giinat ni WBC No.10 light flyweight contender Mark 'Thunder' Vicelles sa Omega Gym ang wa'y pilde niyang rekord sa impresibong paaagi human iyang gipatikangkang si Junuel Lacar sa Surigao del Sur sa main event sa "Kumbati 5" boxing event sa Omega Sports Promotions International niadtong Miyerkules sa hapon didto sa IPI Sports and Recreational Complex sa Barangay Casuntingan, Mandaue City.

Gipalukapa sa hingpit ni Vicelles si Lacar sa oras nga 1:47 sa ikaupat nga hugna.

Si Vicelles nagkupot na karon og 12-0-1 record uban ang 6KOs,  samtang si Lacar adunay 8-6-3 uban ang 6KOs.

Ang katropa ni Vicelles nga si Carlo Bacaro nagpabilin sab nga wa'y pilde human gipaundang ang Mandauehanon nga si Jeffrey Stella sa wala pa magsugod ang ikaupat nga hugna. Mao kadto ang ikaunom nga sagunson nga daog ni Bacaro, lima niini pinaagi sa knockout.

 Nangharos tanan ang upat ka mga boksidor sa Omega diin sila si featherweight prospect Penitente 'Peter Pan' Apolinar (12-1, 8KOs) ug light flyweight 'Bomber' Christian Araneta (18-1, 14KOs) sa Borbon, Cebu parehong midaog pinaagi sa unanimous decision batok nilang Jetro 'Silent Operator' Pabustan ug Richard Rosales.