Usa na lang ka daug

Lakers mosakmit sa ika-17 nga kampiyonato sa kasaysayan sa ilang prangkisa

CEBU, Philippines — Nakarekober dayon ang Los Angeles Lakers human mapaso sa Miami Heat atol sa ilang panag-abot sa Game-3 niadtong Lunes.

Si LeBron James mibagnos og 28 puntos alang sa Lakers nga mipabugnaw sa Heat sa Game-4 sa iskor nga102-96 aron pag-inat sa ilang bentaha ngadto sa 3-1 sa "best-of-seven" NBA Finals kagahapon didto sa Orlando, Florda.

Ang four-time MVP ug three-time NBA champion nga si James dili lamang mangtas sa opensa, nagbangis sab sa ubang aspeto sa duwa uban ang walo ka assists ug 12 ka rebounds alang sa Lakers nga mitikang ngadto sa usa na lang ka daog aron sakmiton ang ika-17 nga kampiyonato sa kasaysayan sa ilang prangkisa.

Kon ugaling modaog na sab sa Game-5, hayan nga bisbisan sab sa Lakers ang 10 ka tuig nga huwaw nila sa titulo, butang nga gusto nilang kab-oton agi'g pahinungod ni anhing Kobe Bryant nga ilang gitamod ug gihandum. 

Namawi sab si Anthony Davis nga mihipos og 22 puntos inabagan ni Kentavious Caldwell-Pope nga miamot og 15 puntos, apil na ang krusyal niyang tres ug ingon man lay-up sa naghinapos nga bahin sa duwa nga nakapabalik sa labaw sa Lakers ngadto sa siyete puntos sa nahabiling dos minutos.

Ang alas sa Heat nga si Jimmy Butler mihipos lamang og 22 puntos, samtang si Bam Adebayo nga niahat og duwa bisan og dunay injury, mitampo'g 15 puntos.

Ang Heat igo lamang nakalabaw og kuwatro puntos sa iskor nga 33-29 sa ikaduhang kuwarter gumikan kay mibanat dayon ang  Lakers aron moabante sa halftime, 49-47.

Nahinam kadiyot ang duwa human ang Heat nakatabla, 83-83, apan mikayod sab dayon ang Lakers pinaagi ni Caldwell-Pope nga mipalabaw sa Lakers ngadto sa 95-88.

Gitiwasan sa Lakers ang Heat pinaagi sa lay-up ni Rondo Rajon nga gisundan sa 3-pointer ni Davis nga maoy nagtuldok sa kadaogan sa Lakers.