3-1 na ang Lakers nagdanga-danga sa West finals

CEBU, Philippines — Nagdanga-danga na sa Western Conference finals ang Los Angeles Lakers dihang ila na sab nga giugbok ang Houston Rockets, 110-100 sa Game-4 sa "best-of-seven" semifinals series kagahapon didto sa Orlando, Florida.

Si Anthony Davis mipabuto og 29 puntos uban ang 12 ka rebounds alang sa Lakers nga mibingat sa ilang bentaha ngadto sa 3-1.

Samtang si LeBron James kuwang na lang og usa ka assist aron morehistro og "triple-double" human siya mikolekta  og 16 puntos, 15 ka rebounds ug siyam ka assists.

Mikisaw sab si Alex Caruso nga mipupo og 16 puntos ug ingon man si Rajon Rondo nga mihipos og 11 puntos, 10 ka rebounds ug walo ka assists alang sa Lakers nga nanginahanglan  na lang og usa ka daog aron motikang sa Western Conference Finals.

Miaksiyon hinuon og takilid ang Lakers human makalabaw og 23 puntos sa katapusang kuwarter gumikan kay gipabuthan sila sa Rockets og 18-2 nga bomba aron pagsikit niini ngadto na lang sa siyete puntos sa iskor nga 96-103.

Apan dali nga nakarekober ang Lakers pinaagi nilang Davis ug Caruso nga milansang og tres sa himalatyong segundos aron pagselyo sa ikatulong sagunson nga daog sa Lakers.

Si Russell Westbrook mikamada og 25 puntos, samtang si James Harden mitali og 21 puntos alang sa pilderong Rockets.

Sila si Eric Gordon ug Austin Rivers nagkumboya'g 33 puntos alang sa Rockets nga mosuway pagpabuhi sa ilang season sa ilang pakigsangka batok sa Lakers sa Game-5 ugmang         adlawa.

Ang modaog sa Lakers ug Rockets maoy makigharong sa modaog  sa series tali sa LA Clippers ug Denver Nuggets sa Western Conference Finals sunod semana.

Ang Clippers maoy kasamtangang naglabaw sa series, 3-1.