GM paragua hari sa 6th Stay at Home Chessfest
CEBU, Philippines — Gipuhalan ni Grandmaster Mark Paragua ang lig-on kaayong kontra aron dominahon ang ikaunom nga edisyon sa binulan nga Stay at Home Chess Challenge nga giulohan og "The National" niadtong Sabado.
Gihuman ni Paragua ang duha ka oras nga torneyo bitbit ang 72 puntos aron paglugwa niining kampiyon nga nagdalit kaniya og P5,000 nga ganti.
Si IM Joel Pimentel mibulsa og P4,000 sa pagpahiluna niini sa ikaduhang dapit uban ang 58 puntos ug gisundan kini ni Sherwin Tiu nga dunay 52 puntos. Sila si FIDE Master Nouri Alekhine ug Mari Joseph Turqueza, nga parehong mitali og 44 puntos, maoy miokupar sa ikaupat ug ikalimang puwesto.
Si National Master Merben Roque, Grandmaster Darwin Laylo, Jerome Villanueva, David Elorta ug Henry Lopez maoy naglangkob sa top 10. Awtomatik silang nakaangkon og luna sa grand finals karong Disyembre.
Sa laing bahin, ang top 5 female finishers mao sila si Queenie Samarita, Jeryln Mae San Diego, Kylen Mordido, Fiona Gwyneth Guirheem ug Cherry Ann Mejia, samtang ang top 5 kiddies mao sila si April Joy Claros, Dave Lavandero, Marc Benedict, John Lance Valencia ug Mezhikiah Romann Montes.
Si Singapore-based International Arbiter ug FIDE trainer Lincoln 'Linky' Yap maoy top senior. Nagsunod kaniya mao sila si Jess Bitoon ug Roberto Inocian nga miyembro sa Cebu Executives and Professionals Chess Association (CEPCA).
- Latest
