Edito Villamor "ala" sa kanunay

CEBU, Philippines — Sa tanang mga boksidor nga nag-agi sa ALA Gym, si Edito Villamor maoy labing espesyal.

Siya maoy bugtong boksidor nga gitugotan nga modala sa ring name nga ALA sa dihang nahimo siyang pro niadtong 1989.

Si Edito "ALA" Villamor impresibong midala sa pangan sa notadong gym sa Sugbo. Nahimo siyang usa sa labing hayag nga mga bitoon nga misidlak sa kalangitan sa Philippine boxing.

Atol sa iyang panahon niadtong dekada '90, si Villamor susama sa usa ka rockstar. Gipaluyohan sa bagang panon sa iyang mga fans, dugokan sa kanunay ang iyang mga away.

Si Villamor mipaambit nga una siyang nakat-on og boksing sa edad nga 15-anyos ubos sa paggiya ni anhing Paciano "Noy Pacing" Flores isip trainer sa ALA Gym nidtong 1986. Lakip sa iyang mga kadungan mao sila si Andy Tabanas, Gerry Peñalosa, Rey Cosep ug ang managsuong Alfante.

Niadtong panahona, nailhan ni Villamor si Antonio "Bidoy" Lopez Aldeguer nga maoy nagtukod sa ALA Gym niadtong 1985.

Mao kadto ang  nagmarka sa maanindot nilang relasyon nga milanat og kapin sa tulo ka dekada hangtod nga nanirado ang ALA Gym niadtong miaging semana tungod sa nagpadayong pademiya ug sa pagkasira sa ABC-CBN nga dugay na nilang TV partner.

"Si sir Ala hands on sa training dili lang sa boxing kondili tanan values sa life ang itudlo niya. Regarding sa money kon unsaon paggasto. Tudloan ka niya sa ensaktong panamit, maayong pamatasan ug in dealing with other people. Dili siya gusto nga ang boxing i-look down as a profession. Gusto niya nga taas ang pagtan-aw sa uban sa mga boxers.

"Isip boxer dako og tabang sa akong pamilya. To make the long story short, I'm grateful to sir ALA for everything I have, and for who I am today," dugang pa ni Villamor nga mibulsa og P75 sa dihang midaog siya pinaagi a desisyon batok ni Dante Abalorio sa una niyang away sa amateur niadtong Hunyo 1986 didto sa Toledo City.

Upat ka tuig ang milabay, si Villamor nahimong pro. Iyang gipalukapa si Jun Mendoza sa iyang pro debut niadtong Hunyo 3, 1989 didto sa Tanjay City, Negros Oriental.

Human wa'y pilde-pilde sa nag-una niyang 25 ka away, si Villamor miaway alang sa world title, apan gitumba sa ikapitong hugna ni Thai Anucha Pothong sa ilang IBF minimumweight championship match niadtong Hunyo 27, 1993 didto sa National Stadium sa Bangkok, Thailand.

Si Villamor nahatagan og laing higayon nga moaway alang sa world title, apan gipakamang siya ni WBC 105-pound champion Ricardo "Finito" Lopez sa Mexico niadtong Marso 16, 1996 didto sa MGM Grand sa Las Vegas, Nevada.

Ang maong kapildihan maoy nagparetiro ni Villamor uban ang record nga 29 ka daog, 26 pinaahi sa knockout, duha ka pilde, ug usa ka tabla.

Usa ka tuig ang milabay, si Villamor miabli og bag-ong panid sa iyang karera isip trainer. Ang wala niya mahimo isip boksidor iyang nakab-ot isip trainer gumikan kay nakahulma man siya og pipila ka world champions diin si  four-division world titlist Donnie "Ahas" Nietes maoy labing maayo niyang produkto.

Ang 49-anyos nga si Villamor nga mamahimong "Golden Boy" karong Oktubre 18, nanikay-sikay sa iyang dalan pataas dili lamang isip coach, trainer ug matchmaker, apan sa pagpadagan sab sa mga kalihukan sa ALA Gym isip manedyer niini.

Mao nang daw sa nahugno ang kalibotan ni Villamor human ang ALA Gym misab-it sa ilang gloves nga wala damha sa kadaghanan. "I'm proud to say nga wala ko'y kahiubos. Instead, I'm very grateful to ALA Gym, and to sir ALA, sir Mike and the whole family kay grabe ang ilang nabuhat nako as a boxer, trainer, gym manager and matchmaker. In behalf of my family, thank you Ala Boxing Gym, and thank you ALA Promotions.Godbless," panapos pa ni Villamor.