Bye UV, hello up: Jancork Cabahug miabli bag-ong panid sa iyang karera

CEBU, Philippines — Nanamilit na ang Sugboanong basketbolista nga si Jancork Cabahug sa University of the Visayas (UV) Green Lancers, ang iyang pamilya sud sa dul-an usa ka dekada, aron moabli og bag-ong panid sa iyang karera uban sa University of the Philippines (UP) Fighting Maroons sa UAAP.

Si Cabahug pormal nga nananghid ni UV Basketball team manager Gerald Anthony 'Samsam' Gullas Jr. sa usa ka tigum niadtong Huwebes sa hapon didto sa city hall sa Talisay diin si Gullas nagsilbe sab nga mayor.

"To boss kuya Samsam (Gullas), my profound gratitude for the undying support you have given me throughout the years," matud pa ni Cabahug. "Big thanks also to all those who, in one way or another, have helped me in times of need."

"To all my coaches especially to coach Gary Cortes, thank you for guiding me in my growing basketball career. I am most thankful to you. If not for my UV family, I wouldn’t be where I am today. I am very grateful for the amazing seven years!".

Si Cabahug maoy ikalima nga player nga migawas sa Cebu Schools Athletic Foundation, Inc. aron mangindahay sa  Manila duha ka bulan sukad gikanselar sa CESAFI ang tibuok niining 2020 season gumikan sa pandemiya.

Ang sama niyang All-Star nga teammate nga si Gabriel Cometa unang mitapon sa San Beda Red Lions sa NCAA, samtang sila si CESAFI Juniors MVP Leobert Andrew 'LA' Casinillo sa Sacred Heart School-Ateneo de Cebu (SHS-AdC) Magis Eagles ug Vincent Raymund 'Soysoy'     Escobido  ug Nichole Jay Cabanero sa Don Bosco Greywolves gibira sa University of Sto. Tomas (UST) Tiger Cubs sa UAAP.

Si Jancork ikaupat nga henerasyon sa prominenteng Cabahug clan sa Dakbayan sa Mandaue nga mikulit og legasiya uban sa UV Lancers.

Ang iyang uyoan nga si Elmer 'Boy' Cabahug, isip Lancer, mikulit og kasaysayan isip labing unang Cebuano player nga nakadaog og season MVP, kampiyonato sa Cebu Amateur Athletic Association (CESAFI na karon)    ug national title sa parehong high school ug college.

Ang iyang lolo nga si Eduardo 'Eddie' Cabahug, gibansagan og "The Skipper", maoy top gunner ug co-captain sa Lancers nga mipilde sa Ateneo Blue Eagles, 64-53 aron dominahon ang 2nd National Inter-Collegiate Championships sa Rizal Memorial Coliseum didto sa Manila niadtong 1957. Mao kadto ang labing unang duwa nga gi-televise sa kasaysayan sa Philippine basketball. Ang iyang lolo sa tuhod nga si Atty. Cesar Cabahug star player sab sa Visayan Institute (UV na karon) nga nahimong National Open champions niadtong 1938. Sa susamang tuig, ang VI nakaangkon og dungog isip bugtong team nga nakapilde sa bisitang Waseda University ballers sa Japan.

Ang 21-anyos nga si Cabahug way duda nga mosidlak isip usa ka bitoon sa umaabot. Gawas nga maayo mokupot og bola ug hait ang tirada, ang 6'3" nga forward mangtas sab sa low post.

Sa pito ka tuig niya sa UV, si Cabahug milugwa nga All-Star MVP sa high school ug kolehiyo. Kanunay nga sakop sa Mythical Five, si Cabahug nakatilaw og duha ka kampiyonato uban sa Lancers niadtong 2017 ug 2018 season.

Matud pa ni Cabahug nga komportabli kaayo siya sa UP kay pipila ka mga players ug coaching staff niini sama kaniya mga Bisaya.

Si Maroons head coach Bo Perasol lumad gikan sa Dakbayan sa General Santos City, samtang makauban sab ni Cabahug sa UP ang iyang mga katagilungsod nga sila si Condrad Catapusan (USC Warriors) ug Pio Longa (SHS-Ateneo de Cebu).

"I will give my 100 percent best. I will be more focused and give my full commitment and dedication to win. I will improve myself not only as a player but also as a role model in the society," dason pa ni Cabahug kabahin sa bag-o niyang papel isip Isko.

Labaw sa pagkab-ot sa iyang damgo nga makaduwa sa PBA, ambisyon sab ni  Cabahug nga mamahimong kampiyon sa kinabuhi. "My ultimate goal is to fulfill my family’s wishes for me, which is to finish a college degree and become a professional basketball player. I also want to be a better version of myself both in basketball and in life," batbat pa ni Cabahug.