Molapas sa jao pamultahon, ikiha

CEBU, Philippines — Si Games and Amusements Board (GAB) chairman Baham Mitra mipahimangno nga pahamtangan og multa ug legal nga aksiyon kadtong mga molapas sa probisyon sa Joint Administrative Order (JAO). Ang JAO naglatid sa mga lagda ug patakran nga i-implementar kabahin sa hinay-hinay nga pagbalik sa mga professional sports sa nasud.

Ang tanang sports ubos sa GAB sama sa pro basketball, football, boxing, MMA ug muay thai mahimo nang magsugod og balik sa ilang training human gi-release ang JAO nga pirmado nilang Mitra, Department of Health (DOH) Secretary Francisco Duque III ug Philippine Sports Commission (PSC) Chairman William 'Butch' Ramirez niadtong Lunes. Segun sa nalatid sa JAO, ang pagtugot sa mga kalihukan sa pro sports nagdepende kon unsa ang level sa risgo sa usa ka lugar. Sa mga high risk areas nga anaa sa ECQ ug MECQ sama sa Dakbayan sa Sugbo, kadto lamang mga non-contact sports ug individual exercises ang puwede.

Sa moderate risk areas (GCQ ug MGCQ), ang mga  championship ug non-championship combat sports fights sama sa boxing, MMA ug muay thai nga gi-iskedyul gawas sa nasud nga naglangkob og atleta nga lisensiyado sa GAB puwedeng mahimo. Kabahin sa football ug basketball, tag-lima lamang ka players ang tugotan nga makabalik og training sa  GCQ areas ug 10 ka players ang puwedeng makabalik sa pisikal nilang pagpakondisyon sa mga MGCQ areas.

Ang mga training sa boxing puwede na sa mga MGCQ areas, apan kinihanglan nga ang mga fighters walay sintomas sa Covid-19 sa miaging 14 ka adlaw.

Sa mga dapit nga ubos kaayo ang risgo, ang praktis ug aktuwal nga mag duwa tugotan sa kondisyon nga estrikto niining pagasundon ang mga nalatid sa JAO.

Matud pa ni Mitra nga ang JAO dunay sukip nga silot ug kadtong mga molapas niini pamultahon ug pasakaan og kaso depende sa gibug-aton sa salaod.