Magis Eagles TV mihimo'g kasikas

CEBU, Philippines — Nahunong man tuod ang mga kalihukan sa paugnat sa kusog tungod ning pandemya, apan padayon nga mikisaw ang Cebu basketball tungod sa Magis Eagles TV nga nagpasundayag ni bisan kinsang Sugboanong atleta.

Si Raul Baron, ang parent coordinator sa Sacred Heart School-Ateneo de Cebu (SHS-AdC) Grade School Basketball, nagkanayon nga ang Magis Eagles TV resulta sa hiniusang panglimbasog sa mga coaches, ginikanan ug players sa ilang tunghaan.

"The basketball community of Ateneo de Cebu is a closely-knit family composed of the players, coaches, and the parents," matud pa ni Baron.

"With the mandated social and physical distancing required under the COVID-19 pandemic, we wanted to maintain the camaraderie even through social media, to remain updated ourselves of the goings-on of the players of Ateneo and from other schools, and get to know a different side of our players," dugang pa niya.

Gilusad niadtong Hulyo 3, ang mga dinapit  nilang salida mao ang mga players sa University of the Philippines (UP) Fighting Maroons nga sila si Janjan Jaboneta, Pio Longa ug Noah Webb sa UAAP.

Sa ikaduha niining edisyon niadtong Hulyo 10, sila si kanhi La Salle team captain ug two-time UAAP champion Kib Montalbo ug PBA veteran Emman Monfort maoy milugwa.

Ang mga sumusulbong nga bitoon nga sila si Isaiah 'Ice' Blanco-Hontiveros sa University of Cebu Junior Webmasters, Vincent Raymund 'Soysoy' Escobido sa Don Bosco Greywolves, Kendrick Abarquez sa University of San Jose-Recoletos Baby Jaguars ug John Aguilar sa SHS-Ateneo Magis Eagles maoy nanghugyaw sa ikatulong episode niadtong Hulyo 17.

Ang Magis Eagles TV makita live sa Facebook page sa Magis Eagles Basketball Team matag Biyernes sa alas-7:30 sa gabii.

Sa ikaupat niining episode ugmang adlawa, Hulyo 24, ang mga point guards nga sila si Kyle Ochavo sa University of Southern Philippines Baby Panthers, Kendall Limana sa Southwestern University-Phinma Baby Cobras, Zylle Cabellon sa University of the Visayas Baby Lancers ug Justin Maglasang sa Magis Eagles maoy mga dinapit sa senemanang pasundayag diin ang mga hosts mao sila si Hejie Suralta ug Eunilyn Chua.