Gesta nagpanikad na
CEBU, Philippines — Ang Sugboanong boksidor nga si Mercito 'No Mercy' Gesta nagpanikad nang mohagit sa wa'y pildeng World Boxing Council (WBC) USNBC lightweight champion nga si Hector 'El Finito' Tanajara Jr. karong Hulyo 24 (Sabado, Hulyo 25 oras dinhi sa Pilipinas) didto sa Fantasy Springs Casino sa Indio, California.
Gani upat ka adlaw sa dili pa ang away, ang 32-anyos nga si Gesta mideklarar na sa iyang kaandam nga makigrambol batok mas batan-on niyang kontra.
"I'm well prepared and it's going to be a great fight," matud pa ni Gesta, lumad gikan sa Barangay Labogon, Mandaue City apan toa na karon magpuyo sa San Diego, California.
Wala hinuon mohatag og prediksyon si Gesta kay sayod man siya nga bisan unsa mahitabo sud sa ring.
"I'll stick to my game plan and let's see during the fight," tubag pa ni Gesta sa dihang gisukna kon plano ba niyang tumbahon si Tanajara.
Gusto hinuon ni Gesta nga makabawi human siya gipilde pinaagi sa knockout ni Juan Antonio Rodriguez ug nagtabla ni Carlos Morales sa miagi niyang duha ka away.
Apan angayan siya nga magmatngon.
Bisan tuod og lapad siya og kasinatian ug nagbitbit og impresibong 32-3-3 record uban ang 17KOs, si Gesta moasdang batok sa 23-anyos nga si Tanaraja nga wa pay pilde sa 19 ka away uban ang 5KOs.
Si Tanajara modepensa sa ikaduhang higayon sa titulo nga iyang nadaog human gipilde si Ezequiel Aviles pinaagi sa unanimous decision niadtong Agosto 10 sa miaging tuig didto sa Verizon Theater sa Grand Prairie, Texas.
- Latest
