E-Painters nagpanikad moparada sa ilang line-up

CEBU, Philippines — Ang Rain or Shine Elasto Painters nagpanikad nang moparada sa ilang line-up sa PBA nga gilangkuban og kombinasyon sa mga batan-on ug beterano nga dunay lapad nga kasinatian sa PBA.

Masaligon ang E-Painters nga ang ilang linyada takus ug haum iparang sa bisan unsang team nga ilang makabangga sa pagbalik unya sa aksiyon sa PBA.

Sila si James Yap, Beau Belga ug Gabe Norwood gipaabot nga maoy mangu sa mga tadhang players nga mogiya sa mga bag-ong sulbong sa liga nga sila si Adrian Wong, Clint Doliguez, Prince Rivero ug Vince Tolentino.

Ang Rain or Shine usa sa mga teams nga dunay labing daghan nga rookie players.

Bisan pa man niini, si Belga malaumon nga lisud matarog ang ilang grupo. "Yung mga rookies namin, parang mga beterano na  rin. Di mo na iko-consider na rookies," dason pa ni Belga sa labing unang episode sa 'Beyond the Game with The Dean' webcast ni Quinito Henson sa The Philippine STAR.

Midugang si Belga nga usa sab sa ilang inspirasyon mao ang maanindot nilang salida sa pre-season.

Nanghinaut ang E-Painters nga makasaka sila gikan sa ikasiyam nga puwesto nga ilang natapos sa miaging Governors Cup.