De La Hoya miinsister moaway balik

CEBU, Philippines — Dose ka tuig sukad siya nakatilaw og makapakurat nga kapildihan sa mga kamot ni Manny Pacquiao nga naghatod kaniya ngadto sa pagretiro, ang gibansagang 'Golden Boy' sa boksing nga si Oscar de la Hoya nagpinsar karon og lawom nga mobalik og away.

Segun sa taho ni Anthony Cocks sa ringnews24.com, si De la Hoya nga karon 47-anyos na ug malampusong promoter, miinsister nga seryoso siya sa iyang ring comeback 12 ka tuig sukad sa katapusang nakapakita og aksiyon ibabaw sa ring.

Si De la Hoya wala na makaaway pa sukad siya gikulata ni Pacquiao nga miresulta sa iyang pagsurender human sa ikawalong hugna sa ilang welterweight bout niadtong Disyembre 6, 2008 didto sa MGM Grand sa Las Vegas.

Niadtong panahona, grabe ka dehado si Pacquiao ug misaka pa gani kini og duha ka dibisyon aron lamang makasangka si De la Hoya, apan ang garbo sa mga Pinoy milugwa uban ang usa sa makapakugang nga kadaogan sa kasaysayan sa boksing.

Nahugno sa makapadismaya niyang kaparotan nga diha-diha si De la Hoya nakahukom nga moretiro na.

Kapin usa ka dekada ang milabay ug karon Hall of Famer na, daw sa nausab ang kasingkasing ni De la Hoya.

Sa dihang nahinabi ni CBS Los Angeles sportscaster Jim Hill, si De la Hoya mikumpisal nga ang pag-away og balik usa ka butang nga iyang gihunahuna matag adlaw.

“I’ve been actually training and actually running. Who knows if it a fight will take place at the end of  the year or early next year, but I’m getting there. I feel really good,” sumala pa ni De la Hoya.