Labangon, Tisa, City Central, sambag 1 dancers misidlak
CEBU, Philippines — Nagmasidlakon ang mga pambato sa Labangon, Tisa, City Central School ug Sambag I sa labing unang Cebu City Barangay Dancesport Online Competition nga gipahigayon niadtong weekend. Nakabira ang Labangon og tulo ka golds, unom ka silvers ug walo ka bronzes, ang Tisa mipugnit og tulo ka golds uban ang upat ka silvers ug usa ka bronze, ang City Central dunay tulo ka gold, duha ka silver ug tulo ka bronze medals, samtang ang Sambag I naka-angkon og duha ka golds ug duha ka silvers.
Nakadaog og golds sa Labangon mao sila si Shawnna Hernandez ug Prinz Rodriguez sa Juvenile 2 solo jive ug Christian John Torrejas sa Juvenile 2 boys chacha. Si Mitchloni Dinauanao mitunol og duha ka golds sa Tisa sa Junior 2 girls chacha ug jive. Ang iyang teammate nga si Julia Mae Nerves maoy nanghawod sa Juvenile 1 girls solo jive.
Si James Villanueva nakalabni og duha ka golds sa City Central pinaagi sa Juvenile boys solo chacha ug jive, samtang ang iyang kauban nga si Xian Ignoria naka-gold sa Juvenile 2 girls solo chacha.
Nalabni sa Sambag I ang ilang duha ka golds gikan ni Matthew Jay Minoza sa Junior 1 boys chacha ug jive.
Ang uban pang nakamina og bulawang medalya mao sila si Raine Inlajusta sa Guadalupe (Juvenile 1 gilrs solo chacha), Ran Marie Princess sa Inayawan (Junior 1 girls chacha), Hanna Joy Baculi sa Pardo (Junior 1 girls jive), Jim Jocson sa Minglanilla (Junior 2 boys chacha), Jaydel Pat sa Mambaling (Junior 2 boys jive), Paige Ianah Silud sa San Nicolas (Youth girls chacha ug jive), ug Francis Isiah Diluvio sa Parian (Youth boys chacha ug jive).
- Latest
