Vince carter miretiro sa NBA

CEBU, Philippines — Si eight-time All-Star Vince Carter mipahibalo kagahapon sa iyang pagretiro sa NBA human sa mabulukon nga 22 ka tuig.

Sul-ot ang uniporme sa Atlanta Hawks, ang 43-anyos nga si Carter miduwa sa katapusang higayon sa NBA niadtong Marso 11, susamang adlaw diin gisuspenso sa liga ang kasamtangan niining season human nagpositibo si Utah Jazz big man Rudy Gobert sa Covid-19.

"I'm officially done playing professional basketball," pahibalo pa ni Carter pinaagi sa iyang "Winging It" podcast.

Si Carter maoy No. 5 overall pick sa Golden State nidtong 1998 NBA Draft, apan gi-trade siya sa Toronto Raptors diin siya nahimong 1999 NBA Rookie of the Year.

Ang kataas niya og layat naghatod kaniya sa 2000 NBA Slam Dunk Contest title ug sa bansagon nga "Air Canada."

Gawas sa Raptors ug Hawks, nakaduwa sab si Carter uban sa the New Jersey Nets, Orlando Magic, Phoenix Suns, Dallas Mavericks, Memphis Grizzlies ug Sacramento Kings.        

Sud sa 1,541 ka regular season games, si Carter mi-average og 17.2 points, 4.4 rebounds, 3.2 assists ug 1.0 steals.

Sa 2000 Sydney Olympics, siya maoy nangu sa US team nga naka-gold medal uban ang average nga 14.8 puntos matag duwa.