Plania gusto si WBO champ Navarrete
CEBU, Philippines — Duha ka adlaw gikan sa makapakurat niyang kadaogan batok ni WBO top bantamweight contender Joshua 'Don't Blink' Greer Jr., ang Pinoy'ng boksidor nga si 'Magic' Mike Plania mobalik dayon og training pangandam sa mga dagkong away sa umaabot.
Biya kaayo sa away diin siya gipahibalo sud lamang sa tulo ka semana batok sa usa ka dekalibreng kontra, gipakugang sa pambato sa Sanman Promotions ang kalibotan sa boksing human iyang gitumba si Greer duha ka higayon dayon na ngadto sa pagkulit og kadaogan pinaagi sa majority decision niadtong Miyerkules didto sa MGM Grand sa Las Vegas.
"Una sa tanan, dako nakong pasalamat sa atong Ginoo nga iya kung gitagaan og kusog ug kaalam sa dula," matud pa ni Plania, ang kasamtangang WBC Asian Boxing Council Silver and IBF North American super bantamweight champion."Salamat sad kaayo sa mga tawo nga nagsuporta nako ug sa akong pamilya."
Kabahin sa sunod niyang plano, ang garbo sa General Santos City nagkanayon nga iyang itugyan ang tanan sa iyang manager ug promoter nga si Jim Claude 'JC' Manangquil, ang CEO sa Sanman Promotions.
Apan kon siya maoy pabut-on, gusto sa 23-anyos nga si Plania nga hagiton si WBO super bantamweight champion Emanuel Navarrete sa Mexico kon hatagan og kahigayonan.
Si Navarette (31-1, 27KOs) misakmit sa WBO 122-pound title human gipukan si Isaac 'Royal Storm' Dogbe sa United Kingdom pinaagi sa desisyon niadtong Disyembre 8, 2018 didto sa Madison Square Garden sa New York.
Ang 25-anyos nga si Navarette nakadepensa sa iyang trono lima ka higayon, ang katapusan pinaagi sa 11th round TKO batok ni Jeo Santisima sa ALA Gym sa wala pa ang lockdown niadtong Pebrero 22 didto sa MGM Grand Garden Arena sa Las Vegas.
"Sa next fight nako, nag-agad pa ko sa ako manedyer kon unsay iyang plano para nako," sumala pa ni Plania. "Pero para sa ako next fight, gusto nako awayon si Emanuel Navarrete kon naay world title shot."
- Latest
