Plano sa omega giabibahan

CEBU, Philippines — Nakaangkon og suporta gikan sa komunidad sa boksing ang Omega Pro Sports International (OPSI) sa plano niining ibalik ang aksiyon sa ring taliwala ning pandemiya sa kondisyon nga ilang tumanon ang tanang mga lagda sa kaluwasan kon ugaling tugotan sila sa kagamhanan.

Si Omega Gym head trainer Julius Erving Junco sa sayo pa nagkanayon nga hinay-hinay na nilang gihikay ang ilang closed-door card nga buot nilang ipahigayon karong Hulyo o Agosto, apan ang tanan mag-agad sa desisyon sa Games and Amusements Board (GAB).

Bisan pa man niini, ang Omega Gym nakakuha og abiba sa lakang niining nga tabangan pagpabarog ang boksing nga nalukapa gumikan sa Covid-19 sud na sa tulo ka bulan.

"It is laudable on the part of Omega (OPSI) to move to restart boxing the soonest possible time. Of course, I am for restarting boxing only when all the safety protocols are already in place and agreed upon,' matud pa ni Arnie Najera, ang presidente sa Professional Boxing Official-Central Visayas (PBO-CV).

"The welfare of the boxers, trainers, promoters, boxing commission and officials, and all other boxing stakeholders must be paramount," dugang pa ni Najera nga usa sab ka international judge.

Si promoter JC Manangquil sa Sanman Promotions nga tuo magbasi sa General Santos City uyon sab sa maong ideya basta gisangonan kini sa gobiyerno.

"Agree kaayo ko ana. Ako mismo mo-promote maski closed doors pag mo-allow na ang GAB ug ang atong government. Pagka karon, health is important for everyone," sumala pa ni Manangquil.

Si ALA Gym manager Editor Villamor, sa iyang bahin nagkakanayon nga nagigo gyud ang boksing ning krisis, apan siya nanghinaut naga mabalik sa ang boksing sa Pilipinas sa tukmang panahon.

Alang sa mga trainers ug boxers nga nagsalig sa boksing aron dunay pagkaon nga ikabutang sa ilang lamesa, ang pagbalik sa boksing maoy ilang gilantaw sa unahan.

"Nindot kaayo ni ilang plano. Maayo gyud unta og madayon na ila promotion sa IPI para sab mobalik ang kompiyansa sa ubang mga boxers nga naa gihapon ang boxing taliwala ning Covid karon," kanayon pa ni Big Yellow Gym chief trainer Christopher 'Pingping' Tepora.

"Uyon ug lipay kaayo ko sa nindot kaayong plano sa Omega Gym. Dako kaayo ni nga tabang sa mga boxers nga makaaway sila og balik. Kahibalo man gyud ta nga kon walay boxing, wala po'y kwarta ang boxers ug mga trainers sama nako. Basta subay lang sa balaod ug mosunod ta sa gobiyerno, naa gyud ang akong suporta," batbat pa beteranong trainer nga si Brix Flores sa Noy Pacing Boxing Academy. 

Si kanhi world title challenger Melvin 'Gringo' Jerusalem sa ALA Gym naglaum sab nga ang boksing mabalik na gumikan kay ang mga boksidor kinahanglan nga mo-away aron katabangan ang ilang pamilya ilabi ning panahon sa kalisdanan.

"Maayo gyud og mabalik ang boxing kay luoy kaayo ming mga boxers nga wala dula-dula kay mao baya amo trabaho. Mao ra na amo gisaligan samot nang naay mga pamilya lisud kaayo. Kon madayon na ila plano, maayo kaayo na para sa boksing," segun pa ni Jerusalem, ang kasamtangang WBC No.1 minimumweight contender. (BANATNEWS)