Mbala hapit madagit sa Agila
CEBU, Philippines — Human makadaog og duha ka sagunson nga MVP awards ug gipangulohan ang La Salle Green Archers ngadto sa kampiyonato sa UAAP, ang pangan ni Ben Mbala pabiling nakataktak sa Philippine collegiate basketball.
Agi'g pahinumdum, si 'Big Ben' Mbala mao ang alas sa Southwestern University (SWU) Cobras sa dihang ilang gisakmit ang labing una nilang titulo sa Cebu Schools Athletic Foundation, Inc. (CESAFI) ubos sa paggiya ni coach Raul 'Yayoy' Alcoseba niadtong 2012. Si Mbala mibutyag nga ang pagduwa sa Ateneo Blue Eagles mao unta ang una niyang gusto human sa iyang salida uban sa Cobras dinhi sa Sugbo.
"I told you Ateneo was my first choice. I am going to be honest," prangka pa ni Mbala segun sa taho sa Philstar.com.
Matud pa sa 24-anyos nga si Mbala nga mao kini ang una niyang plano gumikan kay ang La Salle daghan man kaayo og bigman niadtong panahona nga nagpasabot og gamay nga playing time alang kaniya.
Apan nausab ang huna-huna sa Cameroonian nga higante human gikumbinser ni kanhi La Salle coach Aldin Ayo na mas labing maayo nga adto siya mapunta sa Green Archers kay daghang maayo nga oportunidad ang nagpaabot kaniya.
Mao kini ang nakapausab sa dagan sa karera ni Mbala diin siya nakabira og duha ka tropeyo sa MVP ug nakapana og korona alang sa Green Archers. Mibakwit hinuon siya ug wala na moduwa pa sa ikatulo ug katapusan niyang season sa La Salle.
- Latest
