Casimero ihawon ang 'monster'

CEBU, Philippines — Gibati og tumang kalipay si WBO bantamweight champion John Riel 'Cuadro Alas' Casimero nga duna na'y bag-ong petsa ang unification bout nilang WBA/IBF bantamweight champion Naoya 'The Monster' Inoue sa Japan.

Sila si Inoue (19-0, 16KOs) ug Casimero (29-4, 20KOs) gikatakda untang magsinukmagay niadtong Abril 25 didto sa Mandalay Bay Events Center sa Las Vegas, apan nasibog kini gumikan sa  coronavirus pandemic.

Human sa pipila ka semana nga pinaabutay, si MP Promotions head Sean Gibbons mipahibalo dili pa lamang dugay nga duna na sila'y target date, Hulyo 25 alang sa giatngan nga engkuwentro sa susamang binyu.

"Lipay ayo ko nga duna na'y bag-ong petsa ang among away kay maka-focus nako og maayo sa akong training," matud pa sa 31-anyos nga garbo sa Dakbayan sa Ormoc.

Nagdumili hinuon paghatag og prediksyon si Casimero kay wala pa man siya masayod kon unsay ilusad nga away sa 27-anyos nga si Inoue batok kaniya.

"Wala ko kabalo sa ako buhaton kay wala pa man ko kita unsa iya buhaton pero suwayan gyud nako kutob sa ako makaya," matud pa niya.

Apan sa wa'y pagpamilok si Casimero miangkon nga plano nilang palukapahon si Inoue.

"Yes, mao na'y gusto sa mga tawo so kailangan tumbahon gyud," batbat pa ni Casimero. "Wala pa ko kabalo unsa nga round pero mao na amoa plano."