NBA players puwede nang mag-workout

CEBU, Philippines — Sugod karong Sabado (oras dinhi sa Pilipinas), mahimo nang mag-workout ang mga NBA players sa tagsa-tagsa nila ka mga pasilidad.

Apan kining kondisyon limitado lamang sa mga lugar diin ang ilang kagamhanan mipalugak na sa ilang mga lagda kabahin sa kwarantin.

Ang maong lakang usa ka gamay'ng tikang sa dalan sa NBA sa plano niining pagtiwas sa naputol niining 2019-2020 season gumikan sa coronavirus pandemic.

Naglakip sa mga mihangop ning labing uwahing kalamboan mao ang Atlanta Hawks, Oklahoma City Thunder ug Utah Jazz.

Dili hinuon tanan makaabli sa ilang pasilidad  alang sa workout nga buot pagabuhaton sa kadaghanan sa mga players.

Apil na niini ang Los Angeles Lakers ug Clippers gumikan kay istrikto pa gihapon kaayo karon ang pagpatuman sa lockdown sa maong dapit.