7 ka Pinoy nakalinya alang sa world title
CEBU, Philippines — Pito ka Pinoy'ng mga boksidor ang nakalinya aron moaway alang sa world title sa tagsa-tagsa nila ka mga organisasyon ubos sa ilang kapasidad isip mandatory challengers.
Kini naglangkob nilang bantamweights Nonito Donaire Jr. (WBC), Raymart Gaballo (WBA) ug Michael Dasmariñas (IBF), flyweight Giemel Magramo (WBO) ug minimumweight Melvin Jerusalem (WBC).
Sila si flyweight Jayson Mama ug Rene Mark Cuarto nagtirada sab sa korona sa ilang dibisyon sa IBF.
Si Magramo gikatakda untang moaway ni Junto Nakatani sa Japan alang sa bakanteng WBO flyweight title niadtong Abril 4, apan ang away gisibog ngadto sa Hunyo 6. Wala pa sa'y klaro kon madayon ba gumikan sa coronavirus pandemic.
Sa kinatibuk-an, dunay 28 ka mga Pinoy ang anaa sa Top 10 sa upat ka dagkong organisasyon sa kalibotan sa boksing nga mao ang WBC, WBA, WBO ug IBF.
Sa kasamtangan, dunay upat ka Pinoy nga kampiyon sa ilang dibisyon ug kini mao sila si Senador Manny Pacquiao (super WBA welterweight), Johnriel Casimero (WBO bantamweight), Jerwin Ancajas (IBF superflyweight) ug Pedro Taduran (IBF minimumweight).
- Latest
