Imperial nagtimbang-timbang sa iyang ugma

CEBU, Philippines — Gitimbang-timbang karon ni reigning MVP Cebu Schools Athletic Foundation, Inc. (CESAFI)  Sir Shaquille Imperial ang iyang mga opsiyon kabahin sa kon unsay labing maayo alang sa ugma sa iyang karera sa basketbol.

Sa pagka karon, si Imperial wala pa makahukom kon asa siya moduwa sa katapusan niyang tuig sa CESAFI.

Ang All-Star guard miangkon nga nakadawat siya og tanyag gikan sa mga tunghaan sa Manila, apan buot niyang magpabilin sa Southwestern University (SWU)-Phinma Cobras.

Si Imperial nagkanayon nga makig-estorya una siya ni coach Mike Reyes ug lagmit moluwat og desisyon human sa iyang gradwasyon sa kurso nga Bachelor of Science in Business Administration major in Marketing Management.

"Right now I'm weighing my options. Might even stay for the next season with SWU. There are a lot of offers but I'll decide after my graduation," matud pa ni Imperial.

Si Imperial maoy alas sa SWU Cobras nga mipalayas sa three-time defending champion University of the Visayas (UV) Green Lancers sa ilang trono sa CESAFI Season 19 sa miaging tuig.

Mao kadto ang labing unang kampiyonato sa Cobras sud sa lima ka tuig.

Human sa iyang kampanya sa amateur, ang garbo sa Dakbayan sa Lapu-Lapu gusto nga mopakita  sa iyang abilidad sa commercial league.

Iyang damgo ang makaduwa sa PBA ugma damlag. Kon unsa man gani ang iyang lakang sunod, si Imperial magpaabot una gumikan kay nahunong pa man ang kalibotan sa paugnat sa kusog gumikan sa coronavirus pandemic.