Thurman naglungot- lungot ni Pacquiao

CEBU, Philippines — Kon ugaling mabalik na sa normal ang sitwasyon, giklaro ni Keith Thurman nga ang una niyang pagabuhaton mao ang paglihok sa "rematch" nilang Manny Pacquiao, ang boksidor nga wala lamang miilog sa iyang kalibotanong titulo, apan mao sab ang mipilde kaniya sa labing unang higayon.

Si Thurman nakabarog human matumba sa unang hugna aron makatiwas sa gikatakdang 12 ka hugna nga sangka ni Pacquiao sa ilang unified WBA welterweight championship bout niadtong Hulyo 20 sa miaging tuig didto sa Las Vegas.

Human sa eksplosibo nilang kumbati, si Thurman (29-1, 22KOs) napilde pinaagi sa "split decision".

Sa live stream nga gipaambit sa Premier Boxing Champions sa ilang Instagram account, ang 31-anyos nga si Thurman nagkanayon nga wala siya'y nakakitang boksidor nga makahatag ni Pacquiao og maanindot nga away gawas kaniya.

Bisan walay "rematch clause" nga nalatid sa kontrata alang sa una nilang sangka, si Thurman miinsister nga angayan lamang siya nga makigharong og usab ni Pacquiao gumikan kay wala man siya'y pilde nga welterweight champion atol sa ilang engkuwentro.

"I just don't see somebody else really giving him a great fight," matud pa ni Thurman segun sa taho ni Steve Kim sa ESPN. "I also believe I deserve the rematch from being the undefeated welterweight champion at the time."

Sulagma sab kaayo nga sila si Thurman ug Pacquiao parehong wala na makapakita'g aksiyon sukad sila nagbinukbukay ibabaw sa ring siyam ka bulan na ang milabay.