Casimero nagpangagot, palukapahon si Inoue
CEBU, Philippines — Sa paglabay sa matag adlaw, nagkainit sab ang tinguha ni WBO bantamweight champion JohnRiel 'Cuardo Alas' Casimero nga palukapahon si WBA/IBF titlist Naoya 'Monster' Inoue kon ugaling maabot na ang panahon nga magpinaksitay sila ibabaw sa ring.
Ang duha gikatakda untang mag-abot sa usa ka unification bout karong Abril 25 didto sa Mandalay Bay sa Las Vegas, apan gisibog kini ngadto sa wala pa hisayring petsa gumikan sa coronavirus pandemic.
Ang garbo sa Ormoc City miadto sa Amerika niadto pang Pebrero ug sa pagbuto sa coronavirus buot unya niyang mopauli sa Pilipinas, apan wala niya gidayon ang iyang plano kay mas peligro man kini alang kaniya.
Ning higayona, si Casimero nagkanayon nga antuson lang una niya ug adto na lang niya ipahungaw ang iyang kayugot ni Inoue sa adlaw sa ilang engkuwentro.
Wala sab mabalaka si Casimero nga si Inoue mikuha sa kababayan niyang sila si KJ Cataraja ug Albert Pagara isip sparring partners agi'g pangandam batok kaniya.
- Latest
